Góða skapið læknar

Það getur haft góð áhrif á heilsuna að vera í góðu skapi. Læknar og vísindamenn rannsaka nú í æ ríkari mæli tengsl skapferlis og líkamlegrar heilsu. Í nýjasta hefti Newsweek segir frá rannóknum sem sýndu bata hjá parkinson sjúklingum sem fóru i gervimeðferð, sem lýsti sér þannig að borað var gat á höfuðkúpuna og því lokað aftur án þess að nokkuð annað væri gert. Þetta eru svokölluð lyfleysuáhrif sem löngum hafa verið þekkt en þau eru til vitnisburðar um þann kraft sem er í líkamanum til að lækna sig sjálfur. Svo sjá menn líka að geðslagið getur haft neikvæð áhrif á líffæri. Ólafur Þór Ævarsson, geðlæknir segir neikvæða streitu geta valdið breytingum á heilanum og á ýmsum líffærum. Margt bendi til þess að þunglyndi geti valdið breytingum á heilanum sem eru á við heilaröskun. Eins geti streita skemmt kransæðarnar. Undir þetta tekur Sigurbjörn Sveinsson, formaður læknafélagsins. Hann segir þetta nokkuð sem allir læknar kannast við. Hann segir marga lækna þeirrar skoðunar að geðslag manna hafi áhrif á það hvernig mönnum takist að fást við ýmsa sjúkdóma, t.d. krabbamein. En hvernig bæta menn geðslag sitt. Ólafur Þór segir t.d. hægt að takast við þunglyndi á byrjunarstigi með einföldum aðgerðum. Hver og einn verði að þekkja sína streituvalda og kunna ráð til þess að bregðast við þeim og muna að hafa tíma til þess, líka þegar streitan sé mikil.