Brown til sölu?

Sir Alex Ferguson, knattspyrnstjóri Manchester United, hefur í hyggju að setja varnarmanninn Wes Brown á sölulista, en sá síðarnefndi hafnaði nýlega samningstilboði frá United. Samningur Brown við United rennur út næsta sumar og vilja forráðamenn liðsins frekar selja kappann í janúar heldur en að fá ekkert fyrir hann í sumar. Brown er einn launalægsti leikmaður í þeim hópi leikmanna United sem spila reglulega og vilja forráðamenn félagsins ekki gefa honum langtímasamning á borð við aðra lykilmenn, aðallega vegna meiðslasögu kappans, en Brown hefur meðal annars tvívegis slitið krossband í hné. Sir Alex er ekki par sáttur við gang mála og sagði af því tilefni: "Við höfum gert drengnum tilboð og hann hefur neitað því. Þetta er hans ákvörðun, hann getur gert eins og hann vill. Það eru ekki fleiri viðræður á dagskrá, en við viljum koma í veg fyrir að hann fari á frjálsri sölu", sagði Ferguson við The Guardian og taldi að nýjum umboðsmanni væri um að kenna. "Það er ekki hægt að tjónka við fótboltamenn nú til dags", bætti Ferguson við.