Fréttablaðið eykur forskot sitt

Fréttablaðið er sá fjölmiðill á Íslandi sem flestir nota á hverjum degi og er forskot þess sem mesta lesna dagblaðs landsins er enn að aukast, samkvæmt nýrri fjölmiðlakönnun Gallup. Að meðaltali lesa 69 prósent Fréttablaðið á hverjum degi en 51 prósent Morgunblaðið. Er lestur Fréttablaðsins að þessu leyti 35 prósent meiri en lestur Morgunblaðsins. Í sambærilegri könnun í mars síðastliðnum var meðallestur Fréttablaðsinis 66 prósent en Morgunblaðsins 53 prósent. Bilið hefur því breikkað umtalsvert og er munur á lestri blaðanna sá mesti sem verið hefur síðan Fréttablaðið kom á markaðinn. Gildir þá einu hvort horft er til landsins alls eða höfuðborgarsvæðisins. Lestur Fréttablaðsins að meðaltali á dag á höfuðborgarsvæðinu reyndist vera 79 prósent en tæplega 53 prósent á landsbyggðinni. Meðallestur Morgunblaðsins á dag var 57 prósent á höfuðborgarsvæðinu og um 42 prósent á landsbyggðinni. Dagblaðið lásu 21 prósent höfuðborgarbúa að meðaltali á dag en 17,6 prósent á landsbyggðinni. Tæp 91% landsmanna lásu Fréttablaðið eitthvað í vikunni sem könnunin stóð yfir, dagana 22. til 28. maí síðastliðinn. Morgunblaðið lásu 74 prósent eitthvað og tæplega 43 prósent lásu DV að einhverju leyti í vikunni en meðallestur þess á dag mældist 20 prósent. Það gildir nánast einu hvort verið er að tala um aldurshópa, kynjaskiptingu eða búsetu, Fréttablaðið er nánast allsstaðar með umtalsverða yfirburði. Það er sérstaklega áhugavert að skoða breytta stöðu blaðanna á sunnudögum en þar hefur Fréttablaðið náð nánast sömu yfirburðum yfir Morgunblaðið og aðra daga. Í samanburði við aðra fjölmiðla kemur í ljós að Fréttablaðið er sá fjölmiðill sem flestir Íslendingar koma að daglega, 69%. Ríkissjónvarpið er að vanda í öðru sæti en bilið milli þessara risa á markaðnum hefur breikkað. 65% horfa eitthvað á Sjónvarpið að meðaltali hvern dag. Í undanförnum könnunum hefur Morgunblaðið verið í þriðja sæti en sú mikla breyting er nú að Stöð 2 skýst upp í 3ja sætið með 54% og Morgunblaðið fellur í það fjórða með sín 51%. Stór hluti af auknum styrk Stöðvar 2 er áhorf á fréttir, sem hefur stóraukist frá síðustu mælingu. Eins og fyrr segir var könnun Gallup framkvæmd daganna 22-28. maí og var úrtakið 1200 manns. Gallup framkvæmir fjölmiðlakannanir fyrir fjölmiðlanna, Samtök íslenskra auglýsingastofa og Samtök auglýsenda 6 sinnum á ári.