Bleklaus fingraför fyrir áritun

Bandaríska sendiráðið í Reykjavík mun frá og með mánudeginum 28. júní taka bleklaus fingraför, með fingraskanna, af þeim sem sækja um vegabréfsáritanir vegna heimsókna til Bandaríkjanna. Fingraför verða einungis tekin af þeim er sækja um vegabréfsáritun en ekki af þeim sem heimsækja Bandaríkin í 90 daga án áritunar. Bandarísk sendiráð og ræðismannaskrifstofur um allan heim hafa verið að taka í notkun tæknibúnað til töku fingrafara undanfarið ár með það fyrir augum að fullnægja US-VISIT skilyrðum sem eru nú þegar í gildi á 115 flugvöllum og 14 höfnum í Bandaríkjunum. Allir staðir sem gefa út vegabréfsáritanir til Bandaríkjanna munu ráða yfir þessum búnaði frá og með 26. október 2004. Fingraför sem tekin eru í sendiráðum og ræðismannaskrifstofum erlendis verða borin saman við fingraför sem safnað er við komu til Bandaríkjanna á áðurnefndum stöðum. Þessi samanburður er notaður til þess að staðfesta hver réttur handhafi áritunar er til þess að minnka notkun stolinna og falsaðra áritana og til þess að koma í veg fyrir að rangur aðili komist inn í landið. Í fréttatilkynningu bandaríska sendiráðsins kemur fram að þessum gögnum sé safnað í þeim tilgangi að framfylgja innflytjendalögum Bandaríkjanna, og verði einungis deilt með öðrum opinberum aðilum sem komi að innflytjendamálum.