Noregsvefur opnaður

Noregsvefurinn á Íslandi verður opnaður í dag í norska sendiráðinu í Reykjavík. Noregsvefurinn er sniðinn að staðháttum allra landa sem hýsa opinber norsk sendiráð og/eða sendiskrifstofur og íslenska útgáfan hefur veffangið www.noregur.is. Á þessari heimasíðu eru margvíslegar upplýsingar um Noreg, þ.á.m. um norsk stjórnmál og efnahagsmál, ferðamál, rannsóknir og menningarmálefni. Einnig er þar að finna uppfærðar upplýsingar um margs konar starfsemi á Íslandi sem tengist Noregi auk menningarviðburða. Vefurinn er liður í aukinni áherslu norska utanríkisráðuneytisins á notkun veraldarvefsins til upplýsinga og kynninga varðandi Noreg. Á síðunni má meðal annars finna upplýsingar um Íslandsheimsókn Hákons krónprins og Mette-Marit krónprinsessu, en þau koma til landsins 27. júní. Mun krónprinsinn meðal annars opna listsýninguna "Kynjaverur, ný leirlist frá Noregi" í Hönnunarsafni Íslands í Garðabæ. Þá mun hann opna nýtt bátahús við Síldarminjasafnið í Siglufirði. Hákon og Mette-Marit verða ásamt íslensku forsetahjónunum viðstödd tónleika norska jazzfiðluleikarans Ola Kvernberg á Nasa að kvöldi 29. júní.