Loðnan fundin

"Það er langur vegur frá því að hægt sé að fullyrða nokkuð þrátt fyrir að þetta gefi okkur vissulega von," segir Hjálmar Vilhjálmsson, loðnusérfræðingur hjá Hafrannsóknarstofnun, en nokkur loðna hefur fundist fyrir norðan Hornbjarg og djúpt norður af Húnaflóa. Gullberg frá Vestmannaeyjum hafði til að mynda náð 500 tonnum í þremur köstum snemma í gær en þeir voru fyrstir á vettvang eftir ábendingu frá flugmönnum í eftirlitsflugi. Um talsvert stóra torfu virtist um að vera en ekki náðist samband við þau skip sem að veiðum voru. Þungu fargi er þannig létt af mörgum en þær raddir hafa heyrst að undanförnu að stofn loðnu gæti beinlínis verið hruninn. Hjálmar segir að of snemmt sé að segja til um hvort þarna sé um að ræða miklar breiður. "Það þarf að rannsaka hversu mikið magn þetta er en á þessari stundu skal ekki fullyrt um neitt. Þarna er vissulega um þá staði að ræða sem líklegt var að loðnan sýndi sig á og það gefur tilefni til bjartsýni en að öðru leyti er lítið um þetta að segja fyrr en við vitum meira." Rannsóknarskipið Árni Friðriksson heldur út í dag og verður stefnan tekin norður fyrir til frekari rannsókna en að auki eru sex loðnuveiðiskip sem þátt taka í loðnuleitinni. Eitt þeirra er grænlenskt en hin íslensk og fyrir hjálpina fá þau í staðinn að veiða sem nemur þremur fullförmum af loðnu en Hafrannsóknarstofnun hefur ekki opnað fyrir almennar loðnuveiðar á þessu sumri. Ekki stendur heldur til að breyta þeirri ákvörðun fyrr en meira er vitað. Björgólfur Jóhannsson, forstjóri Síldarvinnslunnar og formaður Landssambands íslenskra útvegsmanna, segir það hafa verið viðbúið að einhver loðna finndist. "Það er auðvitað gleðiefni og í takt við það sem flestir hafa haldið en það er allt á huldu enn sem komið er með magnið sem þarna er. Þetta er vonandi byrjunin á glæstri loðnuvertíð en of snemmt er að fagna fyrr en frekari niðurstöður liggja fyrir."