Aðgangur að farþegaupplýsingum

Frá og með 28. júlí næstkomandi mun bandaríska Tolla- og Landamærastofnunin fá aðgang að farþegaupplýsingum úr bókunarkerfi Icelandair um farþega á leið til Bandaríkjanna. Samkvæmt bandarískri löggjöf eru öll flugfélög sem fljúga til Bandaríkjanna skyldug til að veita þessar upplýsingar. Um er að ræða þær upplýsingar sem farþegi gefur upp við bókun og kaup á farseðli til Bandaríkjanna, þ.e. fullt nafn, fæðingardag og ár, heimilisfang, símanúmer og greiðslumáta. Einnig þær séróskir sem farþegi kann að hafa og vill koma á framfæri, t.d. varðandi veikindi, fötlun eða mataræði. Á heimasíðu Icelandair er greint frá þessari upplýsingaskyldu og veitt svör við spurningum sem upp kunna að koma. Samkvæmt tilkynningu frá Icelandair hefur flugfélagið haft samráð við íslensk stjórnvöld, þar á meðal Utanríkisráðuneytið og Persónuvernd, um öryggi upplýsinganna og hyggst utanríkisráðuneytið tryggja íslenskum ríkisborgurum sömu vernd um persónuupplýsingar og Evrópusambandið samdi um fyrir evrópska ríkisborgara og kynnti með ákvörðun 14. maí síðastliðinn.