Breytir engu um afstöðu

Flestir hagsmunaaðilar sem koma fyrir allsherjarnefnd Alþingis í dag telja nýtt fjölmiðlafrumvarp engu breyta um afstöðu þeirra til laganna. Blaðamannafélag Íslands gagnrýnir yfirlýst áform ríkisstjórnarinnar um að hægt verði að kjósa um ný fjölmiðlalög í þingkosningum eftir 3 ár. Allsherjarnefnd Alþingis heldur áfram umfjöllun um fjölmiðlafrumvarpið, en í dag er komið að því að fá hagsmunaaðila á fund nefndarinnar. Fundur hófst klukkan 9, en þá komu fulltrúar frá Norðurljósum og Ríkisútvarpinu og gáfu álit sitt. Að þeirra mati breytir nýtt fjölmiðlafrumvarp í engu afstöðu þeirra til málsins, eins og hún var þegar fyrra frumvarp var samþykkt í maí. Þá studdi Ríkisútvarpið málið, en yfirmenn Norðurljósa ekki. Sigurður G. Guðjónsson, forstjóri Norðurljósa, segir nýja frumvarpið enn verra fyrir fyrirtækið, því samkvæmt því falla öll útvarpsleyfi úr gildi árið 2007, en í nýsamþykktum lögum áttu þau sum hver að renna út á lengri tíma. Aðrar útvarps- og sjónvarpsstöðvar eru nú á fundi allsherjarnefndar, en eftir hádegið koma fulltrúar frá starfsmannafélagi Fréttar og frá Blaðamannafélaginu. Stjórn Blaðamannafélagsins barðist mjög gegn setningu laganna í vor og er álit Blaðamannafélagsins nú efnislega það sama, enda telur stjórn félagsins að nánast um sama frumvarp sé að ræða. Þá gagnrýnir Blaðamannafélagið þá hugmynd ríkisstjórnarinnar, að almenningur geti kosið um lögin í næstu þingkosningum. Í áliti Blaðamannafélagsins er bent á það, að félagið geti ekki með nokkru móti tekið afstöðu í þingkosningum, því þær snúist um flokka. Hinsvegar gæti félagið - líkt og aðrir hagsmunaaðilar - tekið afstöðu í þjóðaratkvæðagreiðslu, sem færi fram eingöngu um þetta mál.