Bíður áhyggjulaust ævikvöld

Ellilífeyrisþegar munu búa við trausta afkomu í framtíðinni og verða óháðir vilja vinnandi fólks til að sjá þeim farborða og veita þeim þjónustu. Að þessu hefur Ásmundur Stefánsson ríkissáttasemjari komist en hann flutti erindi um málið á fundi Tryggingastofnunar í gær undir yfirskriftinni Aldraðir - yfirstétt framtíðarinnar. Í máli Ásmundar kom fram að viðtekin skoðun sé að aldraðir verði vandamál í samfélagi framtíðarinnar. Þeim fjölgi hratt og fyrir vikið þurfi vinnandi fólk fyrir sífellt fleirum að sjá. Heilbrigðiskerfið verði stöðugt dýrara, fjárhagur hins opinbera versni stig af stigi og aldraðir muni búa við fátækt og fá ekki viðunandi hjúkrunarþjónustu. Athuganir hans leiða hinsvegar í ljós að þessu verður þveröfugt farið. Ellilífeyirsþegar munu hafa stöðugar tekjur nánast óháð dyntum stjórnvalda á hverjum tíma og óháð hagsveiflum. Framfærsla þeirra verður ekki vandamál í hörðu árferði heldur munu ellilífeyrisþegar viðhalda eftirspurn á samdráttartímum með reglubundnum tekjum sínum. Raunar líkir Ásmundur lífeyrisþegum framtíðarinnar við jarðeigendur miðalda sem lifðu á jarðarentu sinni. Ein helsta ástæða niðurstöðu Ásmundar er sú staðreynd að réttindi til greiðslna úr lífeyrissjóðum hafa aukist að undanförnu og munu aukast enn á næstu áratugum. Þá mun séreignasparnaðurinn segja sitt þegar þar að kemur. Útreikningar hans leggjast svo ofaná þá staðreynd að fjárhagsstaða íslenskra ellilífeyrisþega er góð, í það minnsta í samanburði við hin Norðurlöndin. Íslenskur ellilífeyrisþegi hefur hærri ráðstöfunartekjur en danskur, finnskur, norskur og sænskur og er munurinn 11 og upp í 34 prósent. Því til viðbótar býr þorri íslenskra ellilífeyrisþega í eigin húsnæði og margur á sitt skuldlaust.