Sekt fyrir brottkast

Héraðsdómur Vesturlands dæmdi í gær útgerðarmann og skipstjóra til greiðslu einnar milljónar króna sektar hvorn fyrir brottkast. Í einni veiðiferð köstuðu þeir fimm og hálfu tonni af þorski aftur í hafið. Mennirnir, sem gera út frá Ólafsvík, voru ákærðir fyrir að hafa hvorki látið hirða, landa, né vega allan afla skipsins í samræmi við lög. Þvert á móti hafi þeir í flestum af 129 veiðiferðum skipsins frá október 1998 til águstmánaðar 1999 varpað kerfisbundið aftur í hafið þorski undir þremur kílóum. Og í einni veiðiferð hafi þeir kastað um fimm og hálfu tonni af þroski aftur í hafið. Málið var þingfest fyrir héraðsdómi í ágúst, en frestað. Þinghaldi lauk hins vegar í gær, þar sem bæði útgerðarmaðurin og skipstjórinn játuðu brot sín. Málinu lauk á grundvelli viðurlagaákvörðunar, sem fest í því að sækjandi leggur til ákveðna sektarfjárhæð og vararefsingu. Fulltrúi Ríkislögreglustjóra lagði til að mennirnir yrðu dæmdir til að greiða eina milljón króna hvor í sekt, en sæta þriggja mánaða fangelsi ella greiði þeir ekki sektina innan fjögurra vikna. Dómari taldi það hæfilegt og lauk málinu þannig.