Deilur útgerðarmanna og sjómanna

Það er víða hart deilt vegna kjaramála. Sjómenn eru með lausa samninga og reyna að semja við útgerðarmenn, en þeir hafa ekki samið með hefðbundnum hætti í meira en áratug. Útgerðarmenn segja samninga sjómanna tuttugu árum á eftir en sjómenn saka tiltekna útgerðarmenn á móti um að virða réttindi þeirra að vettugi. Hart var deilt um kjaramál sjómanna á morgunverðarfundi Verslunarráðs í morgun. Framsögumenn á fundinum voru þeir Gylfi Arnbjörnsson framkvæmdastjóri Alþýðusambands Íslands og Guðmundur Kristjánsson aðaleigandi útgerðarfélagsins Brims. Verkalýðsforystan hefur harðlega gagnrýnt Guðmund að undanförnu fyrir sérsamning sem hann gerði við áhöfn Sólbaks á dögunum. Einkahlutafélag var stofnað um rekstur togarans og samið sérstaklega við áhöfnina. Verkalýðsforystan fær hins vegar ekki að sjá þá samninga og sakar Guðmund í raun um að vega að grundvelli þess sem áunnist hafi í stéttabaráttunni með því að þvinga áhöfnina til þess að semja án aðkomu Sjómannafélagsins. Gylfi Arnbjörnsson segir þetta alvarlegt mál sem ekki verði liðið. Hann segir að sé valkosturinn annað hvort að leggja skipinu eða selja það, eða að víkja ákveðnum þáttum kjarasamningsins til hliðar og setja þorskkvóta á skipið og veiða þar með mikið, sé valkosturinn mjög þröngur. Gylfi segir að erfitt sé annað en að samþykkja upphlaup útgerðarmanna fyrir sjómenn, þar sem þeim sé stillt upp við vegg. Þess vegna séu stéttarfélög, til þess að koma í veg fyrir að fólki sé stillt upp við vegg. Verið sé að vinna í því nú. Guðmundur Kristjánsson, útgerðarmaður hjá Brimi, þvertekur fyrir að nokkrar þvinganir hafi átt sér stað og segir þvert í mót að margreynt hafi verið að ná samningum í gegnum verkalýðsfélögin. Það hafi ekki gengið. Guðmundur segir að sá samskiptamáti sem verið hefur sé orðinn staðnaður og ekki sé eðlilegt að bíða bara og bíða, nú þurfi framþróun á markaðnum og frjálsræði.