Vísar á bug ummælum FÍB

Guðmundur Sigurðsson hjá Samkeppnisstofnun vísar því á bug að rannsókn á tryggingafélögunum hafi verið óeðlileg. Menn geti hins vegar deilt um málalyktir. Hann fagnar því að áfrýjunarnefnd hafi vísað frá máli FÍB sem kærði rannsóknina. Eins og kom fram í fréttum Stöðvar 2 í gær íhugar Félag íslenskra bifreiðaeigenda að höfða dómsmál gegn Tryggingafélögunum. Framkvæmdastjóri félagsins gaf Samkeppnisstofnun falleinkun fyrir frammistöðu sína í málinu; sjö ára rannsókn hefði skilað fimmtán blaðsíðna skýrslu og allar sektir hefðu verið felldar niður vegna dráttar á rannsókninni. Hann sagði þetta engan veginn ásættanlegt fyrir neytendur sem hefðu tapað milljörðum vegna háttsemi félaganna. Guðmundur Sigurðsson, sem hafði yfirumsjón með rannsókn Samkeppnisstofnunar, segist ánægður með að áfrýjunarnefnd hafi vísað frá kæru FÍB á þeim forsendum að félagið væri ekki aðili að málinu. Hann segir að þrátt fyrir að stofnunin hafi fengið ábendingar og athugasemdir frá félaginu varðandi málið gegn Tryggingafélögunum hafi alltaf legið fyrir að þeir væru ekki málsaðilar. Framkvæmdastjóri FÍB sagði furðulegt að sá maður sem var viðskiptaráðherra þegar rannsóknin hófst skyldi síðan hafa siglt málinu í höfn sem oddviti tryggingafélaganna. Guðmundur Sigurðsson segir að aðdróttanir um pólitísk tengsl eigi ekki við rök að styðjast. Samkeppnisstofnun sé sjálfstæð stofnun og óháð ráðherra hverju sinni. Skýrasta dæmið um það sé þegar núverandi viðskiptaráðherra hafi ætlað að sameina Landsbanka og Búnaðarbanka meðan þeir voru enn ríkisbankar. Niðurstaða Samkeppnisráðs um að það væri óheimilt hefði komið ráðherra jafn mikið á óvart og öðrum.