TM dæmd til greiðslu

Héraðsdómur Reykjavíkur dæmdi í dag Tryggingamiðstöðina til að greiða erfingjum Svanhildar Bjarnadóttur 7 milljónir og 50 þúsund króna tryggingabætur. Svanhildur lést eftir að hún féll af svölum fjórðu hæðar hótels á Kanaríeyjum 5. janúar 2002. Bæring Guðvarðsson, sambýlismaður Svanhildar, viðurkenndi fyrir dómi í Las Palmas, að hafa deilt við hana umrætt kvöld, og hann hafi ýtt við eða hrint henni þannig að hún hafi fallið aftur á bak yfir handriðið með fyrrgreindum afleiðingum. Var Bæring dæmdur fyrir manndráp af gáleysi. Svanhildur og Bæring voru tryggð hjá Tryggingamiðstöðinni, sem neitaði að greiða tryggingabætur, þar sem þau voru bæði undir áhrifum áfengis. Dómurinn kemst að þeirri niðurstöðu að Tryggingamiðstöðinni sé skylt að greiða fyrrgreindar bætur, auk málskostnaðar. Mjög líklegt má telja að dómnum verði áfrýjað til Hæstaréttar, þar sem það kann að vera fordæmisgefandi.