Stríðsöxinni sökkt

Fyrrverandi skipverjar varðskipsins Týs og bresku freigátunnar Falmouth, sem börðust hatrammlega í íslenskri lögsögu fyrir nær 30 árum, drukku kaffi um borð í Tý í dag. Gamlir tímar voru rifjaðir upp í varðskipinu, í sátt og samlyndi.  Tilefnið var útgáfa elleftu bókarinnar í flokknum Útkall eftir Óttar Sveinsson. Þar fjallar hann um langalvarlegasta atburð þorskastríðanna sem átti sér stað árið 1976. Mikil heift var komin í stríðið, Týr ætlaði að klippa á vörpu bresks togara, sem var að ólöglegum veiðum, þegar bresku freigátunni Falmouth var siglt á fullri ferð og afli inn í varðskipið. Með tölvutækni hefur atburðurinn verið endurskapaður á bókarkápu.  Óttar segir þetta hafa gerst tvisvar sama kvöldið. Eftir að herskipið sigldi á Tý í fyrra skiptið hafi varðskipið náð að rétta sig af og í kjölfarið hafi Guðmundur Kjærnested skipherra klippt á togarann sem þeir voru að elta. Skömmu seinna hafi Bretarnir aftur komið inn í hliðina á Tý og voru rétt búnir að sökkva honum.   Íslendingur var um borð í freigátunni, Óli Tynes, sem þá var blaðamaður á Vísi. Hann horfði á þegar varðskipið fór nær alveg á hliðina eftir það sem kallað hefur verið morðárás freigátunnar. Óli, sem er gamall sjómaður, segir þetta í fyrsta sinn sem hann hafi orðið hræddur á sjó. Hann hafi óttast mjög að Týr sykki með manni og mús. Undir þau orð tekur fyrrverandi aðgerðarstjóri freigátunnar, Mark Masterman. Hann segir dásamlegt að Íslendingarnir hafi sloppið lifandi frá þessu og að Óttar hafi skrifað bókina. Guðmundur Kjærnested,  skipherra Tý, segir atburðinn vissulega eftirminnilegan og segist jú hafa gluggað í bókina. Mest gaman hafi hann haft af því að lesa hugrenningar áhafnarinnar því þær hafi hann ekki vitað um áður. Spurður hvort ekki sé sérstök upplifun að hitta skipsverjanna af freigátunni segir hann svo ekki vera. Honum finnst meira um vert að hitta sína gömlu skipsfélaga.