Gagnrýni Verslunarráðs ómakleg

Forstjóri Landmælinga Íslands vísar því alfarið á bug að stofnunin hafi nýtt sér hugmyndir einkafyrirtækja og gert að sínum eins og Verslunarráð Íslands ýjar að á heimasíðu ráðsins. Segir Magnús Guðmundsson, forstjóri Landmælinga, að stofnun sín sé ein fárra sem tilnefnd hafi verið sem fyrirmyndarstofnun á árinu 2004 og ekki sé hægt að kenna þeim um góða eða slæma stöðu einkafyrirtækja í svipuðum geira. Rök Verslunarráðs, sem oft hefur gagnrýnt aukin ríkisumsvif, eru þau að stofnun eins og Landmælingar eigi að sinna ákveðinni grunnvinnu eins og viðhaldi og upplýsingagjöf en halda sig fjarri framkvæmdum og framleiðslu gagna í samkeppni við einkafyrirtæki. Þess í stað hafi Landmælingar aukið umsvif sín á þann veg að einkafyrirtæki bera skaða af. Magnús segir þetta af og frá og bendir á að lög séu í gildi um skyldur og gjörðir Landmælinga Íslands og frá þeim hafi ekki verið vikið þó Verslunarráð sé á annarri skoðun.