Öllum reglum fylgt til hlítar

"Þessum athugasemdum lögmanna sækjenda á hendur einkavæðingarnefnd er alfarið vísað á bug," segir Stefán Jón Friðriksson hjá fjármálaráðuneytinu vegna gagnrýni þeirrar er fram hefur komið á störf nefndarinnar í seinna útboði ríkisins á hlut sínum í Íslenskum aðalverktökum fyrir rúmu ári síðan. Stefán sem starfar fyrir nefndina segir alveg ljóst að öllum reglum hafi verið fylgt til hlítar í þessu útboði og öllum öðrum sem fyrir nefndina hafa komið. Tvö þeirra fjögurra fyrirtækja sem buðu í þau tæpu 40 prósent sem í boði voru kærðu útboðið til Fjármálaeftirlitsins og hefur lögmaður þeirra látið hafa eftir sér að ekki aðeins hafi allar leikreglur verið brotnar heldur telur hann einnig að ríkissjóður hafi beinlínis verið hlunnfarinn. Segir hann víst að þeir sem á endanum hlutu hnossið, Eignarhaldsfélag AV, hafi haft vitneskju um dulin verðmæti fyrirtækisins sem aðrir höfðu ekki aðgang að. Er þar bent á nokkur stórverkefni sem tilkynnt var um skömmu eftir að útboðsfresti lauk og einnig að verðmæti svokallaðs Blikastaðalands hafi margfaldast við endurmat fyrirtækisins skömmu síðar. Þannig hafi verðmæti Íslenskra aðalverktaka hækkað til muna á skömmum tíma. Hafa nokkrir þingmenn Vinstri grænna ennfremur vakið athygli á þessu og lögðu þeir fram fyrirspurnir til forsætisráðherra á þingi í vor en hann svaraði þeim engu. Einkavæðingarnefnd heyrir undir forsætisráðuneytið. Óháðir aðilar hafa einnig gefið til kynna að undarlega hafi verið staðið að málum. Þannig setti Verðbréfastofa, sem mat tilboðin fyrir hönd einkavæðingarnefndar, spurningarmerki við þátttöku Eignarhaldsfélagsins í útboðinu. Einn fundarmanna nefndarinnar lét bóka í mars á síðasta ári að Halldór Ásgrímsson utanríkisráðherra hefði gefið sitt álit á þeim tilboðum sem fram voru komin og margir telja ekki ólíklegt að vegna þess hve Fjármálaeftirlitið hefur unnið lengi að rannsókn málsins hafi þeir komist að því að ekki var allt með felldu. Engar upplýsingar var að hafa um framgang rannsóknarinnar þegar eftir því var leitað.