Enginn vöxtur hérlendis

Helsti vöxtur íslenskrar kaupskipaútgerðar er á erlendum vettvangi sé henni skapaður grundvöllur til þess af íslenskum stjórnvöldum enda sé ljóst að kaupskipastóllinn mun ekki vaxa meira hér á landi en þegar er orðið. Þetta kom fram á fundi forsvarsmanna félags skipstjórnarmanna með forstjóra Eimskipa og sagt er frá á heimasíðu félagsins. Félag skipstjórnarmanna hefur undanfarið beint sjónum almennings að mikilli fækkun meðal menntaðra skipstjórnarmanna og leitað leiða til að breyta því ferli. Eina leið til þess telja þeir vera að sú skipaskrá sem notuð er hérlendis verði gerð nógu aðlaðandi til að sem flestir sjái sér í hag að skrá sig í hana en slíku er ekki til að dreifa eins og staðan er. Hafa þeir meðal annars bent á mismun milli skráningar skipa og flugvéla og brýn þörf sé á að alþjóðavæða skráningu skipa eins og gert er erlendis.