Davíð kominn á legudeild

Davíð Oddsson forsætisráðherra hefur verið fluttur á legudeild á Landsspítalanum eftir aðgerð í gær og er líðan hans sögð góð. Davíð var fluttur á bráðadeild Landsspítalans í fyrrinótt vegna gallblöðrubólgu og við rannsókn kom í ljós staðbundið æxli í hægra nýra. Forsætisráðherra gekkst undir aðgerð þar sem gallblaðran var fjarlægð og sömuleiðis hægra nýra. Segir forsætisráðuneytið að aðgerðin hafi gengið að óskum. Davíð er nú kominn á legudeild og er líðan hans sögð góð og segja læknar að framfarir séu eðlilegar eftir aðgerð sem þessa. Ólafur Davíðsson ráðuneytisstjóri getur ekki sagt hve lengi Davíð verður fjarverandi, enda aðgerðin erfið og nokkurn tíma taki að ná fullri heilsu á ný. Halldór Ásgrímsson er nú starfandi forsætisráðherra og Ásta Möller tók sæti Davíðs á Alþingi í gær.