Þýskur Forrest Gump

Það telst afrek að hafa ferðast um heimsálfurnar sjö en Þjóðverjinn Stefan Schlett lét sér það ekki nægja. Hann ferðast um á tveimur jafnfljótum og segir mannskepnunni í blóð borið að hreyfa sig.  Stefan hefur hlaupið 600 maraþon í 77 löndum. Um helgina hljóp hann upp á Hvannadalshnúk og á morgun ætlar hann Laugaveginn. Hann hefur stundað jaðaríþróttir í 23 ár, þ.á m. þríþraut, en segist einnig stunda fjallgöngur og fallhlífarstökk. Hlaupin eru þó hans aðall og þá fyrst og fremst mjög löng hlaup, þ.e. lengri en maraþonhlaup sem er 42 kílómetrar. Þau standa stundum dögum saman og þá gildir að sofa sem minnst og vera fljótur að borða og sinna öðrum köllum náttúrunnar. Stefan segir hámarkið vera að hlaupa þvert yfir heilu heimsálfurnar. Sjálfur hefur hann hlaupið yfir þvera og endilanga Ástralíu, Ameríku og Evrópu. Flug og bíll er líka fyrir aumingja. Stefan segir þennan ferðamáta vera mannskepnunni meðfæddur; forfeður okkar allra hafi verið veiðimenn sem ferðuðust langar leiðir - og svo sé sáraþetta einfalt. Ekki þurfi meira til en góða skó og stuttbuxur. En þegar maður hefur hlaupið nánast alls staðar, hvað er þá eftir? Stefan svarar því til að hann hafi mikinn áhuga á því að hlaupa maraþonhlaup um borð í flugvél. Það væri honum töluverð áskorun.