Eignatjón minnkaði um helming

Ástand brunavarna er slæmt í nær helmingi gistiheimila að því er fram kemur í nýrri ársskýrslu Brunamálastofnunar. Björn Karlsson, brunamálastjóri, telur þó að tölurnar segi ekki alla söguna. "Við erum með einfalt einkunnarkerfi sem metur það hvort aðbúnaður sé samkvæmt bygginareglugerð eða ekki. Það sem tölurnar sýna er að 46 prósent gistiheimila uppfylla ekki reglugerðina að öllu leiti." Ástand gistihúsa hefur ekkert batnað frá árinu 1997 og segir Björn fjölgun þeirra vera helstu skýringuna. "Það er þó nauðsynlegt að taka á ástandinu þar sem það er slæmt, í næstum helming tilvika." Þegar framhaldsskólar víðs vegar um landið voru skoðaðir kom í ljós að 24 prósent þeirra eru með slæmar brunarvarnir og fjögur prósent með algjörlega óviðunandi. Þessar tölur sýna þó að ástandið hefur batnað verulega frá árinu 1998 þegar 60 prósent framhaldsskóla var með slæmar eða óviðunandi brunavarnir. Auk framhaldsskólanna og gistihúsanna gerði Brunamálastofnun könnun á veiðihúsum. Þegar þær tölur eru kannaðar kemur í ljós að sá flokkur hefur hlutfallslega flest í óviðunandi ástandi eða þrettán prósent. Stærstu fréttirnar segir Björn þær að eignatjón vegna bruna á síðasta ár var helmingi minna en undanfarin þrjú ár eða 880 milljónir auk þess sem ekkert manntjón var vegna bruna. "Það eru auðvitað alltaf vissar tölfræðilegar sveiflur í tölum sem þessum en þetta er töluverð breyting. Helsta ástæða þessarar þróunar er sú að slökkviliðin hafa aukið samvinnu sína verulega. Sameining hefur átt sér stað á höfuðborgarsvæðinu og það hefur leitt af sér mun öflugri útkallsdeildir. Þeir eru fljótari á staðinn og það eru oft örfáar mínútur sem stjórna því hvort við fáum stórt eða lítið tjón," segir Björn og bætir því við að öflugt forvarnarstarf sé þó einnig að skila árangri.