Deilur um vegamót á Suðurlandi

Vegagerðin ætlar ekki að gera hringtorg við Landvegamót á Suðurlandi þrátt fyrir að það kosti jafnmikið og þær framkvæmdir sem þegar eru hafnar. Vegagerðin segir umferð ekki nógu mikla um hliðarvegina en verslunareigandi við gatnamótin hafnar því og segir hringtorg nauðsynlegt. Slys hafa verið tíð á þessum gatnamótum og eitt alvarlegasta slysið varð í ágúst 2002 þegar þrjár konur létust. Söluskálinn sem þarna er byrgir sýn þeim sem koma niður Landveginn úr Galtalæk og ætla inn á þjóðveginn. Húsið verður rifið og annar skáli staðsettur fjær gatnamótunum. Nú er þröngt um þá sem stoppa og taka bensín. Meðal þess sem verið er að gera er að búa til aðreinar frá þjóðveginum, eyja verður sett á milli akreina á einum stað og Ásvegur verður færður aðeins austar. Lofuðum framkvæmdum var frestað í fyrra en þá var aðeins fimm milljónum úthlutað til verksins. Svanur Bjarnason, svæðisstjóri Vegagerðarinnar á Suðurlandi, segir að framkvæmdirnar nú kosti 24 milljónir og því til viðbótar komi 5-6 milljónir í færslu Ásvegs austar til að losna við krossvegamót. En ekkert verður hringtorgið, þrátt fyrir orðrómað öryggi þeirra. Svanur segir hringtorgið vera einn kostinn sem skoðaður hafi verið en það hefði kostað á bilinu 25-30 milljónir. Hann segir Vegagerðina hafa álitið að hringtorgið ætti ekki heima þarna þar sem umferðin væri ekki svo mikil á hliðarvegina, Ásveg og Landveg, og umferðin myndi stoppast nokkuð á hringveginum.  Bergur Sveinbjörnsson, verslunareigandi við Landvegamót til sautján ára, slær á þessar útskýringar og segir umferð mjög mikla upp í Galtalæk og sumarhúsabyggðinar þar í kring. Hann efast líka um kostnaðartölurnar sem Svanur nefnir.