Kjalnesingar átelja seinagang

Íbúasamtök Kjalarness átelja þann seinagang sem orðið hefur í lagningu Sundabrautar. "Við erum orðin þreytt á marg endurteknum loforðum um gerð Sundabrautar," segir í ályktun samtakanna sem afhent hefur verið borgarstjóra Reykjavíkur. Hafsteinn Númason, stjórnarmaður í íbúasamtökunum, segir að Sundabrautin hafi verið notuð sem gulrót við sameiningu Kjalarneshrepps og Reykjavíkurborgar og að tími sé kominn til að efna loforðin. Upphaflega hafi átt að byrja á Sundabrautinni árið 2002 en ekkert hafi gerst. "Við viljum fara að sjá einhverja hreyfingu á þessu og skorum á þingmenn landsbyggðarinnar að taka undir með okkur," segir Hafsteinn. "Það er ekki bara verið að gera þetta fyrir Kjalnesinga heldur landsmenn alla. Þetta styttir leiðina vestur um land um tuttugu kílómetra." Til að flýta fyrir framkvæmdum leggja íbúasamtökin til að byrjað verði á framkvæmdum á Kjalarnesi. Það sé hægt þó ekki sé búið að ákveða nákvæmlega legu Sundabrautarinnar sunnan megin, hvort byggð verði hábrú, botngöng eða farin svokölluð eyjaleið.