Actavis sakað um kúgun

Actavis er sakað um að hafa kúgað verkamenn í Búlgaríu og brotið á þeim samninga. Starfsgreinasambandinu hefur borist fyrirspurn vegna meintra brota fyrirtækisins þar. Lögmaður Actavis segir verkalýðsfélög í Búlgaríu ekki hafa gert athugasemdir við starfsemi fyrirtækisins.  Lyfjafyrirtækið Actavis, sem áður hét Pharmaco, hefur um nokkurra ára skeið átt og rekið lyfjaverksmiðju í Búlgaríu. Halldór Björnsson, formaður Starfsgreinasambandsins, segir að sambandinu hafi borist kvartanir þaðan vegna fyrirtækisins. Nánar aðspurður um hvers kyns kvartanir þetta eru segir Halldór að um sé að ræða kvartanir um kúgun og brot á samningum. Hann segir að þeir hafi sett sig í samband við systrafélög sín á Norðulöndunum vegna málsins. Halldór segir að fulltrúar Starfsgreinasambandsins hafi rætt þetta við talsmenn Actavis en engin lausn fengist. Hann segir engan mun á þessu og sambærilegum ásökunum í garð erlendra fyrirtækja sem starfi hér á landi; allt séu þetta alvarleg mál. Hinum finnst peningahyggja skína þarna í gegn.  Í tilkynningu frá Actavis vegna málsins segir að flestar athugasemdanna við starfsemi fyrirtækisins hafi átt við nauðsynlegar hagræðingaraðgerðir félagsins sem tryggi störf og samkeppnishæfni í Búlgaríu. Actavis hafi tekið tvö atriði sem ekki hafi samræmst stefnu félagsins til sérstakrar skoðunar: annars vegar að starfsmönnum hafi verið hótað brottrekstri ef þeir væru í verkalýðsfélögum og hins vegar að þeir væru hvattir til að ganga í verkalýðsfélög sem studd væru af fyrirtækinu. Í ljós hafi komið að enginn fótur hafi verið fyrir þessum ásökunum og að jafnframt hafi verið staðfest að verkalýðsfélög í Búlgaríu hafi ekki gert athugasemdir við Actavis þar.