Írar fram úr Íslendingum

Hve mikilvægt er að banna reykingar á veitingahúsum? Mjög, segir Jeffrey Wigand, pófessor og lífefnafræðingur. Wigand segir Íslendinga hafa staðið sig best í tóbaksvörnum undanfarin ár en ekki megi slá slöku við: "Ef rýnt er í nýjustu tölurnar hafa Írar skriðið fram úr með banni við reykingum á veitingastöðum. Ísland á auðvelt með að ná toppsætinu aftur." Wigand, sem Russell Crowe túlkaði í Hollywood-myndinni The Insider, hittir Jón Kristjánsson heilbrigðisráðherra og Ólaf Ragnar Grímsson forseta í ferð sinni og ræðir meðal annars við þá um nauðsyn þess að banna reykingar á veitingastöðum landsins. Wigand starfaði lengi við rannsóknir hjá þriðja stærsta tóbaksfyrirtæki Bandaríkjanna. Honum ofbauð siðleysi iðnaðarins og uppljóstraði um það í þættinum 60 mínútum í febrúar 1996. Hann hefur síðan haldið fjölda fyrirlestra og hélt einn slíkan á opnum fundi á Nordica hóteli í gær. Þar ræddi hann um óbeinar reykingar, áhrif málaferla á stefnu stjórnvalda og baktjaldamakk tóbaksiðnaðarins.