Einangrunarmúrinn rofinn

Menntun geðsjúkra miðar fyrst og fremst að því að rjúfa þann einangrunarmúr sem þeir hafa lifað í. Það byggir upp sjálfsmynd þeirra og hjálpar hverjum og einum að finna sinn styrkleika. Eða eins og einn nemendanna í Geðhjálparhúsinu orðaði það við Fréttablaðið í gær: "Ég væri komin sjö fet ofan í jörðina ef ég hefði ekki námið hérna." Það var verið að kenna í þremur rýmum í Geðhjálparhúsinu, þegar blaðið leit þangað í heimsókn í gær. Námið er á vegum samstarfsverkefnis Fjölmenntar og Geðhjálpar. Þá stundina var verið að kenna ensku, íslensku og myndlist. Nemendurnir voru á ýmsum aldri, en allir áttu þeir eitt sameiginlegt, brennandi áhuga á náminu. Þeir sem eiga möguleika á að stunda nám á haustönn eru um 90 talsins, að sögn Helga Jósepssonar verkefnisstjóra. "Um 10 prósent þeirra taka áfangabær próf," sagði hann. "Námið hér miðar meðal annars að því að hjálpa fólki til að brjóta niður múrinn, stíga yfir þröskuldinn og koma fram," sagði Guðný Svava Strandberg kennari, sem kennir myndlist og ljóðagreiningu, ásamt fleiru. "Skólinn hefur bjargað lífi þessa fólks. Þetta er það sem heldur því gangandi og sem það lifir fyrir, að taka þátt í náminu, leggja eitthvað af mörkum og sjá eitthvað eftir sig. Fólk hefur útskrifast úr háskóla með okkar hjálp. Sumir hafa dottið út úr skóla, til að mynda vegna eineltis, en fundið sig aftur hér." Samstarfsverkefnið hefur átt erfitt uppdráttar í haust. Illa gekk að tryggja fjármuni til haustannarinnar og starfsfólki var sagt upp. Síðan fengust sex milljónir sem dugðu til 60 prósenta af þeirri kennslu, sem þörf var fyrir. Meðal annars þurfti að ýta út af borðinu kennslu fyrir þá sem eiga við lestrar- og skriftarörðugleika að etja. En nú horfir betur, að sögn Helga, því menntamálaráðuneytið hefur boðað til viðræðna um upptöku samningsins.