Tekjur ríkis af bensíni aukast

Tekjur ríkissjóðs hafa hækkað í réttu samhengi við tíðar bensínverðshækkanir á árinu. Greiddur er virðisaukaskattur af bensíni og dísílolíu og nemur hann 24,5 prósentum. Verð á bensínlítra hefur hækkað um 13 krónur frá áramótum og á dísílolíu um 11 krónur. Væri meðalársverð á eldsneyti það sama og það er í dag væri tekjuaukning ríkissjóðs 750 milljónir króna miðað við verðið sem gilti um áramót. Um tvö hundruð milljónir lítra af bensíni seljast ár hver og um eitt hundrað milljónir lítra af dísílolíu. Sé verð á bensínlítranum eitt hundrað krónur og á dísíllítranum 50 krónur nemur samanlögð árssala um 25 milljörðum króna. Af þeirri fjárhæð fær ríkissjóður fimm milljarða í virðisaukaskatt. Ríkið innheimtir einnig sérstakt gjald af bensíni, svokallað bensíngjald, en það er föst krónutala og aukast tekjur ríkissjóðs því ekki samhliða verðhækkunum. Alls renna um 60% af bensínverði í ríkissjóð.