Sást bera eitthvað vafið í plast

Vitni segist hafa séð til mannsins, sem grunaður er um aðild að hvarfi indónesískrar konu, bera eitthvað vafið inn í plast af heimili sínu á sunnudag fyrir rúmri viku. Lögregla bíður eftir niðurstöðum úr DNA-rannsókn til að staðfesta hvort blóð sem fannst á og við heimili mannsins sé úr konunni.  Samkvæmt heimildum fréttastofu sást maðurinn bera eitthvað fyrirferðamikið, sem pakkað var inn í plast, út í jeppa við heimili sitt við Stórholt um hádegisbil á sunnudag, daginn sem konan hvarf. Aðrar heimildir segja að næst sé vitað um ferðir mannins í Kringlunni um þrjúleytið sama dag. Tæknideild lögreglunnar mun hafa fundið mikið blóð við rannsókn á heimili mannsins, í stigagangi hússins og í jeppabifreið mannsins. Þau ummerki virðast benda til þess að voveiflegir atburðir hafi átt sér stað í Stórholtinu. Maðurinn, sem er barnsfaðir og fyrrum sambýlismaður konunnar, hefur þó neitað því að vita nokkuð um afdrif hennar. Bifreiðar í hans eigu hafa verið rannsakaðar og einnig bifreið konunnar sem stóð við Stórholtið þar til tæknideild lögreglunnar tók hana til rannsóknar í gær. Þá hafa DNA-sýni verið send til rannsóknar í Noregi og búist er við að niðurstöður úr þeirri rannsókn berist á morgun. Enn segist lögreglan ekki sjá ástæðu til að lýsa eftir konunni sem nú hefur verið saknað í meira en átta sólarhringa.