Mikið blóð bendir til átaka

Mikið blóð var í íbúð mannsins, sem nú situr í gæsluvarðhaldi grunaður um að eiga þátt í hvarfi fyrrum sambýliskonu sinnar og barnsmóður, sem ber merki þess að átök hafi átt sér stað. Konan er enn ófundin og ekkert hefur spurst til hennar síðan á sunnudagsmorguninn í síðustu viku. Lögregla bíður nú eftir niðurstöðum úr DNA rannsóknum frá Noregi sem meðal annars koma til með að segja til um hvort blóðið sem var í íbúð og jeppabifreið mannsins séu úr konunni. Maðurinn sem var úrskurðaður í gæsluvarðhald á miðvikudaginn í síðustu viku heldur sig enn við fyrri framburð og segist ekkert hafa með hvarf barnsmóður sinnar að gera. Í gær var sendiferðabíll, í eigu mannsins, sem staðið hefur fyrir utan íbúð hans í Stórholti frá því rannsókn hófst, verið flutt á brott til rannsóknar. Þá hefur bíll konunnar sem staðið hefur fyrir utan íbúð mannsins frá því að hún hvarf einnig verið fluttur af vettvangi. Sendiferðabílinn hefur maðurinn, sem er múrari, notað sem vinnubíl og er geymslurými bílsins fullt af verkfærum. Vettvangsrannsókn lögreglu hefur hingað til einskorðast við íbúð mannsins og helsta nágrenni hennar auk tveggja bifreiða í hans eigu. Rannsókn málsins er umfangsmikil og hefur fjöldi lögreglumanna unnið að rannsókn þess. Ferðir mannsins frá því að síðast spurðist til konunnar og þar til hann var handtekinn á þriðjudaginn í síðustu viku hafa verið kannaðar. Þá hefur fjölda lífsýna verið safnað í vettvangsrannsókninni til greiningar. Enn hefur ekki verið lýst eftir konunni sem saknað hefur verið í rúma viku sem bendir til þess að eitthvað saknæmt hafi átt sér stað.