Eitt fréttir Bylgjunnar

Stærsta frjálsíþróttamót sem haldið hefur verið hér á landi hefst á Laugardalsvellinum í dag. Keppni í a-riðli 2. deildar Evrópubikarkeppninnar byrjar klukkan 14 með sleggjukasti. Alls verður keppt í 21 grein í dag, m.a. í stangarstökkvi kvenna en þar er Þórey Edda Elísdóttir sigurstranglegust. 8-lið keppa í karlaflokki og jafnmörg lið í kvennaflokki. Evrópuknattspyrnusambandið ætlar að athuga atvik í leik Englendinga og Svisslendinga. Sjónvarpsupptökur þýsku sjónvarpsstöðvarinnar ZDF sýna að einn leikmanna Svisslendinga, Alexander Frei, hrækir á Steven Gerrard, leikmann enska landsliðsins. Frei neitar þessum ásökunum sem og fulltrúar svissneska knattspyrnusambandsins. Verði leikmaðurinn fundinn sekur gæti hann fengið 3ja leikja bann líkt og Ítalinn Francesco Totti sem staðinn var að því að skyrpa á Danann Christian Povlsen. Í dag verður leikið í d-riðli Evrópukeppni landsliða. Lettar mæta Þjóðverjum klukkan 16 og Hollendingar Tékkum klukkan 18.45. Tékkar standa best að vígi í riðlinum, eru með 3 stig eftir 2-1 sigur á Lettum. Þjóðverjar og Hollendingar eru með 1 stig eftir 1-1 jafntefli í 1. umferð riðilsins. Í gær gerðu Svíar og Ítalir jafntefli 1-1 og Danir unnu Búlgara 2-0. Svíar og Danir hafa 4 stig í riðlinum, Ítalir 2 og Búlgarar eru án stiga. Ítalir verða að vinna Búlgara í síðustu umferð og treysta á hagstæð úrslit hjá Dönum og Svíum. Phil Jackson þjálfari köfuboltaliðsins Los Angeles Lakers hætti í gær störfum. Það varð sameiginleg ákvörðun Jacksons og Jerry Buss, eiganda Lakers-liðsins, eftir fund með þeim félögum. Jackson er 58 ára og hefur níu sinnum stýrt liði til sigurs í NBA körfuboltanun, sex sinnum Chicago Bulls og þrisvar sinnum Los Angeles Lakers. Alls óvíst er hvað verður um Lakers-liðið á næsta ári því reiknað er með að margir leikmenn kjósi að fara frá félaginu. Bandaríkjamaðurinn Phil Mickelson og Japaninn Shigeki Maruyama hafa forystu þegar keppni er hálfnuð á opna bandaríska meistaramótinu í golfi. Þeir eru báðir á 6 höggum undir pari. Bandaríkjamaðurinn Jeff Maggert er í þriðja sæti, höggi á eftir. Tiger Woods er í 18.-22. sæti, 7 höggum á eftir þeim Mickelson og Maruyama. Bein útsending frá þriðja keppnisdegi hefst á Sýn klukkan 20 í kvöld. Fjórir leikir verða í 1. deild karla í knattspyrnu í dag. Valur keppir við Þrótt, HK við Völsung, Fjölnir við Breiðablik og Þór við Stjörnuna. Allir leikirnir hefjast klukkan 14.