Hannes hættir hjá ÍE

Hannes Smárason, aðstoðarforstjóri Íslenskrar erfðagreiningar lætur af störfum hjá fyrirtækinu til að einbeita sér að starfi stjórnarformanns Flugleiða. Í tilkynningu frá ÍE segir að Hannes muni áfram verða ráðgjafi hjá fyrirtækinu. "Hannes hóf störf hjá Íslenskri erfðagreiningu skömmu eftir stofnun og hefur í sjö ár verið lykilmaður í vexti fyrirtækisins og þróun þess í fullburða líftækni-lyfjafyrirtæki. Um leið og við þökkum góðum félaga fyrir vel unnin störf óskum við honum alls hins besta í framtíðinni," sagði Kári Stefánsson, forstjóri Íslenskrar erfðagreiningar. "Starfsemi Íslenskrar erfðagreiningar hefur sjaldan verið meira spennandi því við erum byrjuð að prófa lyf sem erfðafræðirannsóknir hafa skilað okkur. Á næstunni stefnum við að því að ráða til fyrirtækisins stjórnendur með reynslu og þekkingu á regluverki, leyfisveitingum og markaðssetningu úr lyfjaiðnaðinum til að fylgja eftir viðskiptaáætlunum fyrirtækisins." "Ég lít á það sem forréttindi að hafa fengið að taka þátt í að byggja upp eitthvert merkilegasta líftæknifyrirtæki heimsins með Kára Stefánssyni og öðru starfsfólki Íslenskrar erfðagreiningar. Fyrirtækið er í dag mjög vel í stakk búið til að hrinda markmiðum sínum í framkvæmd og ég hlakka til að fylgjast með framgangi þess. Ég vil líka þakka öllu starfsfólki Íslenskrar erfðagreiningar fyrir samstarfið og fyrir að deila með mér áhuga sínum á að skapa nýja þekkingu í læknisfræði," sagði Hannes Smárason. Starfsemi Íslenskrar erfðagreiningar byggir á rannsóknum í lýðerfðafræði. Þekkingu á erfðafræði sjúkdóma er breytt í afurðir fyrir heilbrigðisgeirann. Hjá fyrirtækinu er meðal annars unnið að meingenaleit, rannsóknum í lyfjafræði og lyfjaerfðafræði, þróun á DNA-greiningarprófum og smíði lífupplýsingakerfis. Lyfjaefnafræðideild Íslenskrar erfðagreiningar í Chicago og Seattle starfar að framhaldsrannsóknum á lyfjamörkum úr erfðafræðirannsóknum fyrirtækisins á Íslandi auk ýmissa þjónusturannsókna fyrir lyfja- og líftæknigeirann.