Hvalfjarðargöngunum lokað

Loka varð Hvalfjarðargöngum í rúmar tvær klukkustundir fyrir hádegi í dag eftir að hjólhýsi valt í göngunum. Óhappið varð þegar klukkuna vantaði tuttugu mínútur í tíu í morgun. Hollensk hjón á hringferð um landið voru á leið suður göngin í Volvo Cross Country bifreið með stórt hjólhýsi í eftirdragi. Ökumaðurinn missti stjórn á bílnum neðst í brekkunni og fór utan í vegg með þeim afleiðingum að hjólhýsið valt á hliðina og lagðist þvert á göngin. Að sögn lögreglu má telja mildi að enginn bíll kæmi á móti því sá hefði ekki átt neinnar undakomu auðið. Ekki urðu slys á fólki. Bíllinn er aftur á móti mikið skemmdur ef ekki ónýtur. Hjólhýsið er sömuleiðis illa farið. Ekki er vitað um tildrög óhappsins en lögregla rannsakar málið. Göngin voru lokuð í rúmlega tvær klukkustundir og urðu vegfarendur, sem hugðust fara um göngin, annað hvort að bíða eða fara fyrir Hvalfjörð eins og í gamla daga. Göngin voru opnuð á nýjan leik rétt fyrir hádegi en þá var búið að fjarlægja Volvoinn og hjólhýsið og hreinsa göngin.