Nýtt trúfélag ásatrúarmanna

Jörmundur Ingi fyrrverandi allsherjargoði sótti í dag um leyfi til að stofna nýtt trúfélag ásatrúarmanna. Hann segir fulla ástæðu til að opinber rannsókn verði gerð á fjárreiðum Ásatrúarfélagsins. Deilur hafa verið innan Ásatrúarfélagsins og í júlí 2002 var fundur þar sem Jörmundur Ingi var settur af sem allsherjargoði. Á morgun hefur Reykjavíkurgoðorð boðað til fundar þar sem meðal annars á að fjalla um hvort krefjast eigi þess að Ásatrúarfélaginu verði skipt upp en Jörmundur Ingi segir að svo virðist sem stór hluti ásatrúarmanna, kannski helmingur eða meira, sætti sig ekki við stjórnarhætti í félaginu og því rétt að skipta upp eignum. Eldri félagar, sem lengst hafa greitt til félagsins, séu fjölmennir í hópi hinna óánægðu. Jörmundur Ingi segir ástæðu til að ákveða hvort krefjast eigi opinberrar rannsóknar á fjárreiðum félagsins. „Síðast þegar reikningar félagsins voru lagðir fram voru þeir ekki áritaðir af löggiltum endurskoðanda. Kosinn endurskoðandi félagsins lagði til að reikningarnir yrðu ekki samþykktir, því hann sá í þeim atriði sem hann taldi ólögleg, en þessu var ekki sinnt. Þá er engin önnur leið en að óska eftir opinberri rannsókn,“ segir Jörmundur Ingi.  Jörmundur Ingi segir Reykjavíkurgoðorð eldra en Ásatrúarfélagið og nú sé verið að stofna goðorð á Suður- og Norðurlandi. Í framhaldinu verði stofnað félag sem haldi utan um goðorðin og því í reynd komin tvö félög ásatrúarmanna. „Ég reikna með að byrjað verði á því strax að sækja um löggildingu sem trúfélag,“ segir Jörmundur.