Leikskólinn fyrsta skólastigið

Allt stefnir í að leikskólanám fimm ára barna í Reykjavík verði gjaldfrjálst að hluta og leikskólinn viðurkenndur sem fyrsta skólastigið. Kostnaður borgarinnnar vegna þessara breytinga verður um 100 milljónir króna á ári. Starfshópur um aukna samþættingu leikskóla og grunskóla í borginni leggur til að frá með haustinu verði fimm ára börnum boðið gjaldfrjálst leikskólanám í þrjár stundir fyrri hluta dags. Tillagan verður lögð fyrir borgarráð á þriðjudag til samþykktar en ráðið hefur þegar tryggt fjárveitingu í verkefnið fyrir þetta ár. Lagt er til að leikskólar vinni afmarkaða námsskrá fyrir börnin þar sem áhersla verði lögð á atriði eins og félags- og samskiptahæfni, hreyfingu, málrækt og tónlist. Leikskólar verða þar með fyrsta skólastigið og hafa samstarf við grunnskólanna. Þetta á ekki síst að draga úr þeim miklu sviptingum sem fylgja því að vera á sjötta aldursári og breytast úr leikskólabarni í grunnskólanema. Sigrún Elsa Smáradóttir, formaður starfshópsins, segir það ákveðið stökk að koma inn í grunnskólann og hópurinn sé með þessu að reyna að brúa það bil. Bæði leikskólarnir og grunnskólarnir heyri nú undir borgina og því eðlilegt að reynt sé að samþætta skólastigin tvö. Sé miðað við fimm ára barn í fullri vistun eða námi, lækkar kostnaður fólks í sambúð úr tæpum 28.000 krónum á mánuði í 19.500 krónur. Einstæðir foreldrar greiða um 11.000 krónur eftir breytingu og námsmenn rúmar 15.000 krónur. Kostnaður borgarinnar verðu,r eins og áður sagði, um 100 milljónir króna á ári.