Aflareglu fiskistofna verði breytt

Nefnd um langtímanýtingu fiskistofna leggur til að aflareglunni verði breytt og framvegis verði veidd um tuttugu og tvö prósent af áætluðum veiðistofni en það þýðir talsverða skerðingu veiðiheimilda. Tilhneigingin hefur verið sú að ofmeta stærð þorskstofnsins á síðustu tuttugu árum, eða að jafnaði um 10%. Ofmatið hefur leitt til þess að í stað þess að afli væri 25% af stofnstærð, eins og stefnt var að með núverandi aflareglu, varð hlutfallið hærra og allt að 30% af veiðistofni sé tekið tillit til afla umfram leyfilegan heildarafla. Skerðing aflaheimildanna er óháð áhrifum umhverfis á stofnstærð. Ef nýliðun verður eins og á undanförnum fimmtán árum má gera ráð fyrir að meðalafli geti orðið um 210-220 þúsund tonn á ári. Nefndin mælir með að aflareglan taki tillit til afla fyrra árs að hálfu til að jafna út sveiflur. Árni Mathiesen sjávarútvegsráðherra segir að engin ákvörðun liggi fyrir um hvort farið verður að tillögunni. Ákvörðun um heildarafla verður ekki tekin fyrr en eftir um það bil eitt ár og því sé töluverður tími til að velta tillögunum fyrir sér. Árni segir þetta vera eitt af þremur meginatriðum sem snerta málið. Hin tvö séu umframaflinn og ofmatið og vegi þættirnir þrír svipað þungt. Farið verði yfir málið á næstunni og metið hvað rétt sé að gera.      [