Dæmd til að borga fimm hunda

Héraðsdómur Reykjavíkur dæmdi nýverið karl og konu til að greiða Hundaræktinni í Dalsmynni á áttunda hundrað þúsund krónur, auk málskostnaðar, vegna fimm hunda sem þau höfðu keypt en ekki greitt fyrir. Í þessu sérstæða máli hafði fólkið keypt fjölmarga Chihuahua-hunda af Hundaræktinni í því skyni að hefja sjálft ræktun. Á síðasta og þarsíðasta ári keypti það svo fjórar tíkur og karlhund til viðbótar. Ágreiningur stóð um hvort það hefði greitt fyrir karlhundinn, en sannanlega hafði ekki verið greitt fyrir tíkurnar fjórar. Kaupendurnir sögðu að hundarnir hefðu verið haldnir svo alvarlegum göllum að ekki hefði verið hægt að selja þá á fullu verði. Dómurinn féllst ekki á það, þar sem kaupendur höfðu engra gagna aflað vegna meintra galla né gert tilraun til að tilkynna seljanda um þá með formlegum hætti. Úrskurður héraðsdóms var sá að fólkið var dæmt til að greiða kröfu Hundaræktarinnar að fullu, 729, 988 krónur, auk dráttarvaxta og málskostnaðar.