DNA-niðurstaðna enn beðið

Lögregla hefur leitað víða í nágrenni Reykjavíkur að Sri Rhamawati, 33 ára gamalli þriggja barna móður, sem ekkert hefur spurst til síðan 4. júlí. Niðurstaðna úr DNA-rannsókn á blóðsýnum, sem tekin voru á heimili og í bifreið manns sem situr í gæsluvarðhaldi grunaður um aðild að hvarfi hennar, er enn beðið. Sri Rhamawati hefur nú verið saknað í tólf sólarhinga. Samkvæmt upplýsingum sem fjölmiðlum bárust frá lögreglu í dag hefur leit að henni farið fram á nokkrum stöðum. Björgunarsveitir hafa lagt lögreglu lið við leitina og þyrla hefur verið notuð til að skoða ákveðin svæði. Lögreglumenn með leitarhunda hafa farið um og gerð hefur verið skipuleg leit um staði í nágrenni Reykjavíkur. Ekkert hefur spurst til Sri frá því hún var gestkomandi í íbúð fyrrum sambýlismanns síns og barnsföður að Stórholti í Reykjavík. Lögreglu var tilkynnt um hvarf hennar að kvöldi mánudagsins 5. júlí og rannsókn hófst strax að morgni þriðjudags. Eftir ítarlega vettvangsrannsókn á heimili mannsins vöknuðu grunsemdir um refisvert athæfi. Í kjölfarið var hann úrskurðaður í tveggja vikna gæsluvarðhald. Búist er við niðurstöðum úr DNA-rannsókn á blóðsýnum, sem tekin voru á heimili hans og í bifreið í hans eigu, eftir helgi en sýnin voru send til rannsóknar í Noregi. Maðurinn sem setið hefur í gæsluvarðhaldi frá 7. júlí neitar því að vita nokkuð um afdrif Sri Rhamawati.