Vondur og einhæfur matur

"Það er rétt að sífellt fleiri kvarta yfir matnum í aðalbúðum en það virðist ekki hafa neitt að segja," segir Oddur Friðriksson, yfirtrúnaðarmaður starfsmanna við Kárahnjúka. Hafa allnokkrir haft samband við Fréttablaðið vegna þessa og segja það fæði sem boðið sé upp á fyrir neðan allar hellur. Undirverktaki Impregilo, Universal Sodexho, sér um alla matreiðslu í búðum starfsmanna samkvæmt sérstökum samningi þar um. Oddur segir að við þau erfiðu störf sem unnin eru við framkvæmd Kárahnjúkastíflu og það hversu lítið annað er við að hafa sé það algjört lágmark að þreyttir starfsmenn gangi að því vísu að fá góðan og næringarríkan mat hvern dag. "Það er erfitt að benda á eitthvert eitt atriði. Menn tala um vondan mat og einhæfan. Það sama er alltaf í boði og það er ákaflega auðvelt að fá nóg af slíku þegar menn puða hér mánuð eftir mánuð."