Meirihluti á móti frumvarpinu?

Ekki er þingmeirihluti fyrir nýja fjölmiðlafrumvarpinu, fullyrðir formaður Samfylkingarinnar og segir hann Sjálfstæðisflokkinn ætla að nota helgina til að beygja Framsóknarflokkinn einn ganginn enn. Formaður Vinstri - grænna telur forsætisráðherra stýra allsherjarnefnd sem sé niðurlægjandi fyrir formann hennar. Stjórnarandstaðan vill drífa fjölmiðlafrumvarpið úr allsherjarnefnd og efna til þjóðaratkvæðagreiðslu. Þriðjung nefndarmanna þarf til að fara fram á fund eins og stjórnarandstaðan hefur gert en hún er ekki sátt við fund á mánudag og finnst sem Davíð Oddsson forsætisráðherra hafi tekið í taumana. Guðjón A. Kristjánsson, formaður Frjálsynda flokksins, segir formann nefndarinnar, Bjarna Benediktsson, hafa gefið til kynna við nefndarmenn að boðað yrði til annars fundar. Svo hafi þeir heyrt af tröppum stjórnarráðsins, þar sem viðtal fjölmiðla við forstætisráðherra fór fram, að ákveðið hafi verið að funda ekki í allsherjarnefnd fyrr en eftir helgi. Stjórnarandstaðan hafi hins vegar í millitíðinni óskað eftir fundi. Össur Skarphéðinsson, formaður Samfylkingarinnar, segir Sjálfstæðisflokkinn ætla að nota helgina til að beygja Framsóknarflokkinn einn ganginn enn. Hann fullyrðir að það sé ekki þingmeirihluti fyrir frumvarpinu óbreyttu. Steingrímur J. Sigfússon, fromaður Vinstri - grænna, segir þetta niðurlægjandi fyrir formann allsherjarnefndar. Honum finnst það ábyrgðarhlutur að halda fjölskyldum starfsmanna Alþingis og þingmanna í óvissu, dögum og vikum saman, um hásumar þegar flestir eru búnir að skipuleggja sín sumarleyfi. Steingrímur segir greinilegt að hvorki stjórnarskráin né mannlegir þættir skipti stjórnarherrana máli. Ofan í fund fulltrúa minnihlutans í allsherjarnefnd kom Davíð Oddsson í þinghúsið. Það kom á óvart þar sem menn héldu að Davíð væri farinn í veiði. Hann vildi ekki svara hreint út hvort hann væri á leið í veiði. Veiðifélagi Davíðs, Jón Steinar Gunnlaugsson, vildi ekkert segja hvort hann væri í veiði með Davíð nú síðdegis - en var hins vegar hæstánægður með 7 kílóa hæng sem hann veiddi í Eystri-Rangá í morgun.