Segir bæjarstjórn beita brellum

Flosi Eiríksson, oddviti Samfylkingarinnar í bæjarstjórn Kópavogs, sakar meirihluta Sjálfstæðisflokks og Framsóknar um að beita brellum við spá um íbúafjölgun. Sigurður Geirdal bæjarstjóri segir mið tekið af meðalfjölgun á síðastliðnum 10 árum. Samkvæmt áætlunum meirihluta bæjarstjórnar Kópavogs er gert ráð fyrir að íbúum fjölgi um 1200 manns á þessu ári. Bráðabirgðatölur um íbúafjölgunina á árinu sýna aftur á móti að þeim fjölgaði um 241 fyrstu fimm mánuði ársins. Árið 2003 var því spáð í endurskoðaðri áætlun að Kópavogsbúum myndi fjölga um eitt þúsund manns en þegar árið var á enda hafði þeim einungis fjölgað um rúmlega 340. Flosi Eiríksson segir hugmyndir meirihluta Sjálfstæðisflokks og Framsóknar ekki standast og einungis leiða til aukins halla og meiri skulda. Hann segir þetta áhyggjuefni því tekjuáætlun sveitarfélagsins grundvallist á íbúafjöldanum. Flosi hyggur að Kópavogsbær sé núna 2-3 prósent undir tekjuáætlun ársins.  Sigurður Geirdal bæjarstjóri vísar því á bug að verið sé að breyta brellum í bæjarstjórn. Hann segir að þegar áætlanir séu gerðar sé jafnan tekið mið af framreiknuðum reynslutölum. Áætlun bæjarstjórnar um fólksfjölgunina í ár og á síðasta ári byggist á meðalfjölgun sl. tíu ára í Kópavogi, sem var um 800 manns á ári, og sl. fimm ára, sem er um 1020 aðfluttra íbúa á ári.  Hægt er að hlusta á viðtöl við Flosa og Sigurð úr hádegisfréttum Bylgjunnar með því að smella á hlekkinn sem fylgir fréttinni.