Fíkniefnum kastað úr bíl

Pakka með fíkniefnum var kastað út úr bifreið sem var á norðurleið skammt frá Blönduósi í gærkvöld. Lögregla kannaðist við mennina í bílnum og gaf þeim merki um að stöðva. Í stað þess að nema staðar var litlum pakka, sem reyndist innihalda fíkniefni, fleygt úr bílnum á ferð. Mennirnir voru handteknir og færðir á lögreglustöðina á Blönduósi þar sem leitað var í bifreiðinni með aðstoð fíkniefnahunda. Ekkert fannst hins vegar og var mönnunum sleppt að loknum yfirheyrslum. Einn mannanna játaði að hafa átt fíkniefnin sem fleygt var úr bílnum og sagði þau hafa verið ætluð til eigin neyslu.