Launamunur mestur á Vestfjörðum

Launamunur á milli kynja á Vestfjörðum, er lang mestur í veitustarfsemi, þar hafa konur aðeins rúm 38 prósent af launum karla og hetjur hafsins bera minna úr býtum en línumenn og vélstjórar í veitustarfseminni. Meðallaun í veitustarfseminni, þar sem Orkubú Vestfjarða er lang stærsti vinnuveitandinn, voru 334 þúsund krónur á mánuði, sem voru hæstu meðallaun í fjórðungnum. Meðallaun í fiskveiðum voru 273 þúsund krónur og þar var kynjamunurinn næst mestur, konur höfðu 40 prósent af launum karla. Lægstu meðallaun á Vestfjörðum í fyrra reyndust vera í landbúnaði, aðeins 79 þúsund krónur á mánuði og þar var launamunur á milli kynja líka minnstur. Konur í landbúnaði höfðu 86 prósent af launum karla. Næst minnsti munur var í fræðslustarfsemi. Meðallaun karla eru hæst á aldursskeiðinu frá fertugu og upp í 45 ára aldur. Athygli vekur að að launamunurinn viðrist ágerast með aldrinum og ná hámarki á fimmtugsaldrinum. Síðan fer munurinn aftur að minnka og laun kvenna, 75 ára og eldri eru orðin 78 prósent af launum karlkyns jafnaldra þeirra.