Veiðar á Hrefnu nánast óþarfar

Hafrannsóknastofnun ætlar síðsumars að gera tilraunir til að fylgjast með ferðum hrefna hér við land sem gæti orðið undanfari þess að veiðar yrðu nánast óþarfar til að fylgjast með lífsháttum stofnsins. Hrefnuveiðum stofnunarinnar í vísindaskyni, er lokið í ár þar sem búið er að veiða þær 25 hrefnur, sem ákveðið var að veiða í ár. Þrír bátar voru leigðir til veiðanna og veiddu þeir á afmörkuðum svæðum umhverfis landið. Þrátt fyrir mótmæli umhverfisverndarsamtaka við veiðarnar er stofninn ekki í neinni hættu því bæði vísindanefnd alþjóða hvalveiðiráðsins og Norðausturatlantshafs-fiskveiðinefndin telja óhætt að nytja hann og telur nefndin óhætt að veiða á bilinu 200 til 400 hrefnur hér við land árlega án þess að raska markmiðum um sjálfbæra nýtingu stofnsins. 36 hrefnur voru veiddar í fyrra og er mikið af kjöti af þeim dýrum enn óselt í frystigeymslum. Reyndar var það dýrara en felstar aðrar kjötvörur, en verðið var lækkað verulega á nýafstaðinni vertíð. Fréttastofunni er ekki kunnugt um hvernig gengið hefur að selja nýjasta kjötið, en mun færri verslanir tóku það til sölu en í fyrra