Ekki gosdrykkjum að kenna

Neysla sykraðra gosdrykkja hefur dregist saman um rúmlega 36.000 lítra síðastliðna 12 mánuði samanborið við síðustu 12 mánuði þar á undan, segir í fréttatilkynningu frá Ölgerð Egils Skallagrímssonar. Ölgerðin sendi frá sér tilkynningu vegna umfjöllunar Lýðheilsustofnunar um of mikið gosdrykkjaþamb. Í tilkynningunni segir einnig að tölur yfir sölu sykraðra gosdrykkja sýni að gosdrykkjaneysla verði ekki sökuð um aukna líkamsþyngd Íslendinga. Neysla á mest selda sykraða gosdrykknum, Coke, hafi dregist saman um 2,3% á því tímabili sem talað er um hér að framan. Á sama tíma hafi hins vegar orðið veruleg aukning á neyslu sykurlausra gosdrykkja og vatns. Neysla sykurlausra gosdykkja hafi aukist um rúmlega 18% en neysla á söluhæsta sykurlausa gosdrykknum, Pepsi Max, hafi aukist um ríflega 58%. Neysla á vatni hafi aukist um rúm 12%.