Góður árangur tóbaksforvarna

Sala á tóbaki á Íslandi minnkaði um 42.5 % á tímabilinu 1984-2001. Þetta er meðal þess sem kom fram í ræðu Hjálmars W. Hannessonar, sendiherra og fastafulltrúa hjá Sameinuðu þjóðunum, sem hann hélt á aðalfundi Efnahags- og félagsmálaráðs Sameinuðu þjóðanna (ECOSOC) sem hófst 28. júní og stendur til 23. þessa mánaðar. Ræðan var flutt í tengslum við umræðu ráðsins um tóbak og heilbrigðismál. Þar fjallaði Hjálmar meðal annars um þau skýru tengsl sem eru á milli tóbaksnotkunar og ýmissa alvarlegra sjúkdóma nútímans. Á Íslandi valdi reykingar dauða 350 Íslendinga á ári. Íslendingar hafi undanfarna áratugi rekið öfluga tóbaksvarnastefnu með lagasetningu, fræðslu til almennings um skaðsemi reykinga, skattlagningu á tóbak og takmörkun heimilda til að markaðssetja tóbak. Meðal annars mætti sjá árangurinn af forvörnum í minnkun á sölu tóbaks sem áður er getið. Markmið stjórnvalda til ársins 2015 sé að draga enn frekar úr reykingum, eða um 15%. Þá hafi tilfellum lungnakrabbameins fækkað. Ísland hefur nýlega fullgilt rammasamning Alþjóðaheilbrigðismálastofnunarinnar um tóbaksvarnir, sem gerður var árið 2003.