Fundi frestað í allsherjarnefnd

Fundi Allsherjarnefndar Alþingis, sem boðað hafði verið til klukkan 10, var frestað til klukkan fimm síðdegis. Leiðtogar stjórnarandstöðunnar eru afar ósáttir við þessa ákvörðun. Þeir höfðu krafist þess að nefndin kæmi saman á föstudaginn var, en þeirri beiðni var synjað og fundur boðaður klukkan 10 í dag. Í gærkvöldi var svo fundinum frestað og stefna stjórnarflokkarnir að því að nota daginn til að ná lausn í málinu. Steingrímur J. Sigfússon, formaður Vinstri grænna, gefur málsmeðferð ríkisstjórnarinnar falleinkunn og segist aldrei á sínum 21 árs þingferli hafa orðið vitni að öðru eins. Formenn stjórnarflokkanna hittust ekkert um helgina, enda hafa þeir ekki verið í bænum. Þeir koma báðir til höfuðborgarinnar í dag og munu ræðast við áður en allsherjarnefnd kemur saman síðdegis. Ágreiningur stjórnarflokkanna felst í því að sjálfstæðismenn vilja afgreiða frumvarpið því sem næst óbreytt, en innan Framsóknarflokksins er þess krafist að frumvarpið verði dregið til baka.