Þrjú ár fyrir kynferðisbrot

Fertugur karl var dæmdur til þriggja ára fangelsisvistar í Héraðsdómi Reykjaness í dag fyrir að hafa beitt fósturdóttur sína grófu kynferðislegu ofbeldi og leitað á vinkonu hennar. Dómarinn segir ákærða ekki eiga sér neinar málsbætur og ljóst að brot hans geti valdið stúlkunum margvíslegum sálrænum erfiðleikum. Maðurinn var sakfelldur fyrir að hafa káfað á brjóstum fósturdóttur sinnar innanklæða þegar hún var 14 ára. Þá er hann fundinn sekur um að hafa haft samfarir við hana ítrekað á árunum 2002 og 2003, en þá var stúlkan 15 ára. Það átti sér stað, ýmist á salerni eða skrifstofu þar sem maðurinn vann. Hann er ennfremur fundinn sekur um að hafa haft samfarir við stúlkuna í hjónaherbergi heimilisins, það er í hjónaherbergi sínu og móður stúlkunnar. Hann þvingaði hana ennfremur til samræðis á salerni fyrirtækisins rétt fyrir jólin 2003, en þá var stúlkan orðin 16 ára. Maðurinn er ennfremur fundinn sekur um að hafa káfað innanklæða á brjóstum vinkonu stúlkunnar og hann er sakfelldur fyrir að hafa átt tæplega 200 kvikmyndir og tæplega 600 ljósmyndir sem sýna börn á kynferðislegan og klámfenginn hátt. Maðurinn þverneitaði að hafa brotið gegn fósturdóttur sinni og vinkonu hennar. Hann sagðist hafa gengið stúlkunni í föðurstað fyrir 13 árum og að ásakanirnar væru runnar undan rifjum unnusta hennar. Hann viðurkenndi hins vegar að hafa átt klámið sem fannst á heimili hans. Dómarar töldu vitnisburð fósturdóttur hans skýran og afdráttarlausan og einkennast af hreinskilni og einlægni. Hann er lagður til grundvallar þess að sakfella manninn og dæma hann til þriggja ára fangelsisvistar og skal öll refsingin vera óskilorðsbundin. Í dóminum segir að atferli ákærða sé til þess fallið að valda fósturdóttur hans sálarháska og tjóni. Maðurinn skal greiða fósturdóttur sinni 1,2 milljónir króna í skaðabætur og vinkonu hennar 150 þúsund krónur.