Samfylkingin mótmælir takmörkunum

Þingflokkur Samfylkingarinnar lýsir eindreginni andstöðu við þær fjöldatakmarkanir sem eru nú teknar upp í Háskóla Íslands og Háskólanum á Akureyri og telur að þær vinni beint gegn þeim markmiðum að hækka menntunarstig þjóðarinnar. Nú sé fólki vísað frá frekari menntun, þeim og þjóðinni til skaða. Þetta kemur fram í tilkynningu sem þingflokkurinn sendi frá sér fyrr í dag. Þingflokkurinn skorar á stjórnvöld að gera skólunum kleift að hverfa frá fjöldatakmörkununum með því að tryggja skólunum nægjanlegt fjármagn til að standa undir rekstri sínum. Íslensk stjórnvöld hafa svelt opinberu háskólana í þessa stöðu, að mati flokksins, og vegna fjársveltis eiga Háskóli Íslands og Háskólinn á Akureyri tvo kosti til að standa undir rekstri sínum: Að fá heimild til innheimtu hárra skólagjalda á grunnnám eða taka upp fjöldatakmarkanir. Þeir hafa ekki látið neyða sig til að óska heimildar til hærri gjalda en farin er sú leið að fjölda nemenda er vísað frá námi við þessa skóla. Nú hefur Háskóli Íslands ákveðið að nota ekki heimildir sem hann hefur til að veita undanþágu á inngöngu í skólann öðrum en þeim sem hafa stúdentspróf af bóknámsbrautum. Það eru hreinar og klárar fjöldatakmarkanir þó þær heiti það ekki. Fjöldi nemenda með stúdentspróf af verknámsbrautum, eða með menntun og reynslu sem er fullkomlega sambærileg við stúdentspróf af bóknámsbrautum, hafa fengið inngöngu í skólann í mörg ár en fær núna ekki inni í skólann. Fólkinu er vísað frá frekari menntun, þeim og þjóðinni til skaða. Um er að ræða hundruði einstaklinga og er skaðinn augljós og mun reynast dýrkeyptur verði ekki horfið frá þessari stefnu segir í tilkynningu þingflokksins. Þar að auki sé nemendum hiklaust vísað frá fari þeir dag fram yfir settan frest til umsóknar eða greiðslu innritunargjalda. Hér er um að ræða grundvallarbreytingu á aðkomu íslensku þjóðarinnar að æðri menntun frá framkvæmd fyrri ára sem þingflokkur Samfylkingarinnar harðlega mótmælir, segir að endingu í tilkynningu þingflokksins .