Nýtt met í jarðgangagerð

Verktakar við gerð jarðganga undir Almannaskarð, skammt frá Höfn í Hornafirði, hafa sett glæsilegt Íslandsmet í gerð tvíbreiðra vegganga að því fram kemur á fréttavef Hornafirðinga. Fyrra metið átti Ístak, í Hvalfjarðargöngum og í Fáskrúðsfjarðargöngum, og Impreglio í aðgöngum Kárahnjúkavirkjunar, um það bil 80 metrar á viku. Nýja metið er 106 metrar eða um 26 metrum yfir gamla metinu metinu. Sprengt var 21 sinni í vikunni og lengdust göngin því um fimm metra í hverri sprengingu að jafnaði. Þrátt fyrir þessi miklu afköst í metrum talið þá var bergið ekkert sérstaklega gott og þurfti að sprauta steypu á nánast hverja sprengifæru, 5-7 rúmmetrar í hvert sinn. Auk þess voru settir upp 8-12 bergboltar í hverja sprengifæru til að styrkja bergið. Nú er búið að sprengja rúman þriðjung af göngunum undir Almannaskarð sem verða rúmlega kílómeters löng. Norskur verktaki og Héraðsverk ehf. sjá um framkvæmdir.