Auð verslunarmiðstöð á Egilsstöðum

Fimm ára verslunarmiðstöð á Egilsstöðum stendur nánast auð. Síðustu versluninni í húsinu var lokað um síðustu helgi. Verslunarmiðstöðin Nían var opnuð árið 1999 á besta stað á Egilsstöðum við gatnamót þriggja þjóðleiða. Þegar inn er komið blasa nú við tómir salir. Þarna voru áður matvöruverslun, verslanir með tölvu og skrifstofuvörur, skartgripaverslun, gullsmiður, ljósmyndavörubúð og framköllunarþjónusta og verslun Símans. Öll er þessi starfssemi farin út. Í þessu 1500 fermetra húsi eru aðeins tvær skrifstofur eftir, Sjóvá-Almennra og Heilbrigðiseftirlits Austurlands. Helsta skýringin er sú að þrjár verslanir í eigu Baugs, Bónus, BT og Office One, fluttu nýlega allar saman í nýtt húsnæði nokkur hundruð metrum norðar og einnig flutti Síminn sig yfir í nýja húsið.  Nú hefur síðustu versluninni í Níunni, Hjá Erlu, verið lokað en þar verslaði Erla Jónsdóttir með húsgögn og gjafavörur. Hún stóð fyrir rýmingarsölu um síðustu helgi en verslunin hættir starfsemi. Hún segir frekar dapurlegt að þurfa að hætta þar sem væntanlega sé mikill uppgangur framundan á Austurlandi. Húsnæðið verður þó ekki autt lengi því prentsmiðjan Héraðsprent hefur keypt það. Erla hafði hins vegar ekki völ á öðru húsnæði nema á verði sem reksturinn gat ekki borið. Hún álítur að þessi atvinnugrein þarfnist einhvers konar stuðnings ef hún á að halda áfram að vera til.