Eftirlit í lögsögu Svalbarða

Þorsteinn Már Baldvinsson, segir mikilvægt að máli Svalbarðasvæðisins verði haldið vakandi. Mótmæli íslenskra stjórnvalda séu liður í því. "Það er mjög mikilvægt að við látum þá vita að það sé álit okkar að þeir hafi ekki lögsögu í þessu máli." Skip Samherja, Vilhelm Þorsteinsson, hefur verið á síldveiðum í lögsögu Svalbarða frá 21. júní ásamt um fimm öðrum íslenskum skipum. Á einni viku kom norska Landhelgisgæslan þrisvar um borð í skipið og segir Þorsteinn Már það heldur oftar en í fyrra. "Við gerum engar athugasemdir við það. Þeir hafa rétt á því. Það er fylgst nákvæmlega með okkur og öllu því sem við gerum." Þorsteinn segir misjafnt eftirlit eftir skipunum á svæðinu. "Þeir fylgjast meira með erlendum skipum en norskum skipum og þeir fylgjast held ég betur með íslenskum skipum heldur en öllum öðrum."